Fyrstu dagar skólaársins

Frá gönguferð í Baugasel í fyrra

Eins og áður hefur komið fram verður skólinn settur úti í Mörk, fimmtudaginn 20. ágúst kl. 16:00. Eftir stutta samveru þar fara nemendur með umsjónarkennara í heimastofur námshópanna. Daginn eftir, föstudaginn 21. ágúst, er viðtalsdagur skólans og umsjónarkennarar hafa þegar sent öllum forráðamönnum viðtalstímana í tölvupósti. Hér eru myndir sem teknar voru á skólasetningunni.

Mánudaginn 24. ágúst er helgaður fræðslu um gönguferðir og útivist. Kennarar fara yfir gönguleiðir göngudagsins með nemendum og síðan áformum við að fá til okkar einhverja reynda göngugarpa, leiðsögumenn og jafnvel einhverja frá Björgunarsveitinni Súlum til að segja okkur frá reynslu sinni og þekkingu á útivist og gönguferðum. Þessum kennsludegi lýkur k. 12:30 en þá fara skólabílar frá skólanum eftir að nemendur hafa borðað hádegismat.

Þriðjudaginn 25. ágúst er svo göngudagur skólans. Þá halda nemendur og starfsmenn í fimm mismunandi gönguferðir sem hæfa aldri og þroska nemenda.

• 1.-4. bekkur munu skoða sig um að Gásum. Með þeim fara, Anna Rós, Jónína Sv., Berglind, Hilmar og Sigga Hrefna. Þetta er fjöruferð svo það er mikilvægt að vera í stígvélum. 
• 5.-6. bekkur ganga frá skólanum að Krossastaðagili og skoða sig um þar. Nemendur ganga í gegnum skóginn ofan við skólann og suður hlíðina að Krossastöðum. Með þeim fara Hulda og Unnar. Muna að vera klædd eftir veðri og huga að því að það þarf að vaða yfir ána.
• 7.-8. bekkur ganga að Hraunsvatni. Gengið verður frá Hrauni og að Hálsi það þýðir að vaða þarf yfir útfallið svo nemendur þurfa að hafa með sér skó sem þeir geta vaðið í ef þeir treysta sér ekki til að stikla yfir. Með þeim fara Jónína Ga., Gulla og Ingileif.
• 9.-10. bekkur ganga á Staðarhnjúk. Með þeim fara Halla Björk, Íris og Inga.

Göngudagurinn telst langur dagur því skólabílar fara frá skólanum kl. 16:00. Áður en nemendur halda í gönguferðirnar fá þeir staðgóðan morgunmat í skólanum. Starfsfólk mötuneytis sér um að útbúa hlaðborð fyrir nemendur með smurðum tortillavefjum, brauðmeti, áleggi, kjúklingaleggjum, ávöxtum og drykkjum þar sem nemendur geta búið sér til nesti. Hægt verður að velja á milli safa eða kókómjólkur. Nemendur þurfa samt að hafa með sér nestisbox og vatnsbrúsa að heiman.

Þeir sem heldur vilja hafa með sér nesti að heiman geta gert það, en sælgæti, snakk og gos eru ekki leyfð í gönguferðunum.

Dagskrá þriðjudagsins er eftirfarandi:

Við vonum að veðrið verði heppilegt til útivistar þennan dag. Þá er bara að muna:

• að búa sig eftir veðri og gönguleið (athuga stígvél og vaðskó)
• taka með sér bakpoka, nestisbox og vatnsbrúsa
• sundföt svo hægt sé að láta gönguþreytuna líða úr sér í Jónasarlaug

með göngukveðjum úr skólanum,

Ingileif og Unnar