Gjafir og góðar óskir
Þelamerkurskóli á marga velunnara, meðal þeirra eru kvenfélögin í sveitarfélaginu.
Kvenfélagið Gleym mér ei sem starfaði í Glæsibæjarhreppi gaf skólanum veglega peningagjöf s.l. vor og fyrir þá upphæð var hægt að kaupa 15 spjaldtölvur til að nota í námi og kennslu. Á afmælishátíðinni í gær gátu nemendur og starfsmenn þakkað kvenfélagskonum formlega fyrir gjöfina.
Í gær færði Kvenfélag Hörgdæla skólanum einnig peninga að gjöf. Þá gjöf á skólinn að nota til að endurnýja tækjakost í verkgreinastofunum. Fyrr á árinu hafði Kvenfélag Hörgdæla fært skólanum peninga til kaupa á kórbúningum.
Formaður skólanefndar greindi frá því í gær að á komandi sumri verður ráðist í endurbætur á A álmu skólans sem er elsti hluti skólabygginarinnar. Fyrir hönd sveitarstjórnar færði hann skólanum nýja myndavél og gjafabréf í Spilavinum svo hægt sé að endurnýja spilaeign skólans.
Nemendur og starfsfólk skólans þakkar gjafirnar og allar góðar óskir sem borist hafa á undanförnum dögum.