Kveðja frá Þelamerkurskóla

Kveðja frá Þelamerkurskóla

Okkur starfsfólki Þelamerkurskóla langar að minnast Öldu Traustadóttur í fáeinum orðum en Alda vann við skólann í fjölmörg ár og á stað í hjörtum okkar allra. Hún hafði einstaklega hlýja og góða nærveru og sýndi nemendum og starfsfólki mikinn náungakærleik. Þann tíma sem Alda vann við Þelamerkurskóla voru gleðistundirnar margar en í kringum hana var alltaf gaman og mikið fjör. Okkur er sérlega minnisstætt þegar starfsmannahópurinn fór saman til Edinborgar og Kanada. Þar lék hún á alls oddi, naut þess að ferðast og hafa gaman með samstarfsfólki sínu. 

Það er sárt að kveðja gamlan og góðan samstarfsmann hinstu kveðju og sendum við aðstandendum Öldu okkar innilegustu samúðarkveðjur. Okkur þótti mjög vænt um hana og minnumst hennar með gleði í hjarta.

Hlýjar kveðjur frá fyrrum samstarfsfólki í Þelamerkurskóla.