Fréttir

Tíminn flýgur hratt og nú eru nemendur komnir í haustfrí. Þeir fá gott skólafrí þar sem við taka starfsdagur og viðtalsdagar eftir helgi. Spjall foreldra og nemenda við umsjónarkennara fara fram ýmist á mánudag eða þriðjudag og við hvetjum foreldra og börn til að eiga samtal heima um það sem þeir vilja ræða í skólanum.

Það var hamagangur í öskjunni þegar miðstigið okkar tók slátur fyrr í vikunni. Sláturgerðin er árlegt verkefni hjá miðstiginu og krakkarnir sýndu dugnað í verki undir styrkri handleiðslu umsjónarkennara. Það var bæði hrært í lifrarpylsu og blóðmör og við hlökkum til að gæða okkur á afrakstrinum.

Í dag fer fram hinn árlegi íþróttadagur samskólanna fyrir miðstig og er því skólasvæði Þelamerkurskóla iðandi af lífi þar sem gestir frá Grenivíkurskóla, Valsárskóla og Stórutjarnarskóla njóta þess að eiga dag með jafnöldrum frá Þelamerkurskóla. Birna íþróttakennari er búin að skipuleggja fjölbreytta og skemmtilega hreyfidagskrá þar sem m.a. má finna litabolta, ratleik í skóginum, fótbolta og sundferð. Fyrsta snjókoma skólaársins stoppar engan og það er ánægjulegt að nemendur skuli á þennan hátt hafa tækifæri til að kynnast jafnöldrum úr öðrum skólum.

Á mánudaginn kemur fáum við góða gesti úr Valsárskóla, Grenivíkurskóla og Stjórutjarnarskóla, en þann dag verður hinn árlegi íþróttadagur miðstigs úr samskólunum fjórum. Birna íþróttakennari er búin að skipuleggja fjölbreytta og skemmtilega dagskrá sem inniheldur m.a. litabolta, fótbolta og ratleik í skóginum og dagurinn endar svo á sundferð í Jónasarlaug. Við minnum alla á að koma með íþróttaföt (buxur, bol og íþróttaskór), útiföt eftir veðri, sundföt og handklæði.

Næstu tvö mánudagskvöld verða haldnir samráðs og fræðslufundir fyrir foreldra á yngsta stigi skólans. Í kvöld hittast foreldrar 1. bekkinga ásamt kennurum og stjórnendum þar sem fjallað verður um hvernig heimili og skóli geta hjálpast að við að gera upphaf grunnskólagöngunnar sem farsælast. Mánudaginn 24. sept. munu foreldrar í 1. - 4. bekk hittast með kennurum og stjórnendum og stilla saman strengi varðandi utanumhald um nemendur þar sem meðal annars verður lögð áhersla á læsisnám barnanna.

Aðalfundur foreldrafélags Þelamerkurskóla verður haldinn í Þelamerkurskóla þriðjudaginn 4. sept. nk. kl. 20:00. Smellið á fyrirsögn til að sjá dagskrá fundarins.

Útivistardagurinn sl. mánudag heppnaðist gríðarlega vel. Veðrið var mjög gott og allir mættu jákvæðir og tilbúnir í slaginn. Flestir nemendur 5.-10. bekkjar hjóluðu með kennarahópi frá Melum og inn að Myrkárbakka þar sem menn grilluðu pylsur og slökuðu á. 16 hraustir krakkar gengu með kennurum upp á Selhnjúk og nutu útsýnis um fagrar sveitir. Ferð sem var krefjandi en skemmtileg og það voru stoltir gönguhrólfar sem komu heim úr þeirri ferð síðla dags. Einn hópur gekk upp Krossastaðagil og yngstu börnin gengu upp í skóginn og fjallið fyrir ofan skólann með sínum kennurum. Þegar heim var komið fóru svo allir saman í sund og nutu samverunnar þar. Takk fyrir frábæran dag!