Fréttir

Í útiskóla var í vikunni verið að vinna með snjóinn og snjókornin því þau eru svolítið eins og við: engin tvö eru eins. Snjórinn var nýttur eins og blað og nemendur mótuðu og máluðu snjókorn. Eftir það var farið í stóru brekkuna norðan við skólann þar sem þoturassarnir komu að góðum notum. Hlátrasköll, tónlist og rjóðar kinnar voru einkennismerki þess fjöruga hóps sem stundaði útinám þennan miðvikudag.

Starfsfólk Þelamerkurskóla óskar nemendum og fjölskyldum þeirra, ásamt öllum velunnurum skólans gleðilegrar jólahátíðar með von um ljúfar stundir og farsæld á nýju ári. Við þökkum öllum gefandi og gott samstarf á árinu sem er að líða.

Á litlu jólunum í Þelamerkurskóla er haldið í fallegar hefðir og er dagurinn einstaklega hugljúfur og skemmtilegur. Þrátt fyrir svolítil ófærðarævintýri á leið í skólann hjá hluta nemendanna áttum við fallegan dag með góðri og gefandi samveru. Dagurinn hófst á tónleikum gítarnemenda skólans ásamt atriði frá Marimba sveit skólans. Við fengum að heyra frásagnir af jólahefðum í Þýskalandi og á Filippseyjum auk þess sem afhent voru verðlaun fyrir hugmyndasamkeppnina um uppbyggingu á námusvæðinu norðan við skólann.

Í mörg ár hefur verið hefð fyrir því í skólanum að fyrir jólin er farið með alla nemendur skólans á skauta í Skautahöllinni á Akureyri. Þetta er alltaf skemmtilegur dagur og nánast allir nemendur bregða sér á skauta undir glymjandi tónum jólalaganna. Eftir skautaferðina gengu nemendur síðan fylktu liði að Ráðhústorginu og sungu þar og dönsuðu kringum stóra jólatréð. Síðan var farið í skólann og nemendur fengu hádegismat. Eftir hádegi var svo jólabíó í skólanum fram að heimferð skólabíla.

Þriðjudaginn 17. desember fór meginþorri nemenda á unglingastigi í upplestrarferð inn á Akureyri. Þeim var skipt í fjóra hópa og fóru hóparnir í mismunandi fyrirtæki þar sem þeir lásu upp fyrir starfsmenn og viðskiptavini úr nýjum jólabókum. Nemendurnir fóru samtals í rúmlega 80 fyrirtæki og fengu frá þeim fínar umsagnir sem sjá má neðar. Flestum fannst þetta skemmtilegt verkefni og þeir stóðu sig allir með sóma. Nemendur komu vel fram og lásu flestir hátt og skýrt. Sumir voru feimnari en aðrir en brutust út úr þægindarammanum og lásu samt fyrir þetta ókunnuga fólk. Allir enduðu svo á því að fá Subway eftir velheppnaðan túr um Akureyri.

Við hófum daginn í dag á jólaljósaferðinni okkar þar sem við kveiktum á um 70 friðarkertum til að lýsa upp aðventuna og njóta fegurðar og friðar. Skólavinir hjálpuðust að og allt gekk eins og í sögu. Að ljósaferð lokinni sungum við og dönsuðum í kringum jólatréð við undirleik Jóns Þorsteins og Kristjáns frá tónlistarskólanum. Þá tók við kósýdagur þar sem nemendur flökkuðu á milli stöðva að eigin vali. Þar varð til fjöldi listaverka í myndmennta- og smíðastofunum auk þess sem nemendur skáru út laufabrauð, spiluðu, forrituðu, prófuðu nýjustu græjur skólans og fengu nudd, slökun og naglalakk.

Um miðbik nóvember var kynning á afrakstri þemaverkefnis á unglingastigi. Þemaverkefnið snerist um það að unglingarnir útbjuggu 2000 manna þorp frá grunni. Þau þurftu að gera sér grein fyrir því hvaða þjónustu þau vildu hafa, hvernig húsnæði, hvaða atvinnu, hvernig sorp- og fráveitumálum væri háttað, það þurfti heitt og kalt vatn og þar fram eftir götunum. Þau þurftu að staðsetja þorpið á eða við landið og hanna húsin, bæði íbúðar- og atvinnuhúsnæði. Krakkarnir luku þemaverkefni um þorpin með glæsibrag og héldu kynningu þriðjudaginn 19. nóvember! Gaman var að sjá hversu margir sáu sér fært að koma og ljúka þessu verkefni með okkur. Heilt á litið finnst okkur verkefnin hafa gengið vel, krakkarnir hafa lært helling af þessu (þó þeir átti sig kannski ekki á því til fullnustu). Íslenskan kom inn sem framsögn og ritun á kynningu, stærðfræðin poppaði upp við að minnka hús og önnur mannvirki og hafa það allt í réttum hlutföllum, náttúrufræðin kom inn í umhverfismenntun. Upplýsingatækni birtist í bæklingum og þar voru enskan og danskan innvinkluð í verkefnið. Smíðar voru nýttar í gerð líkana og myndmennt í málun. Hönnun kom sterk inn þegar þorpið var ákveðið og síðast en ekki síst var samfélagsfræðin tekin fyrir í þorpinu sjálfu, samfélaginu, hvað það þurfti og hvað var hægt að samnýta. Samvinna var svo lykilþátturinn í allri vinnunni.